पाल्पा – पेट्राेलियम पदार्थमा भएकाे मुल्य वृद्धिले पाल्पाकाे विकास निर्माण कार्य प्रभावित बनेकाे छ । डिजेल, मट्टितेल, पेट्राेल, अलकत्रा जस्ता कच्चा पदार्थमा भारी मुल्य वृद्धि हुँदा विकास निर्माणकाे काम राेक्न बाध्य भएकाे निर्माण व्यवसायीले बताएका छन् ।
सरकारले निर्माण उद्याेगी व्यवसायीलाई सहुलियत र मुल्य समायाेजनमा सुबिधा दिन नसके काम गर्न नसक्ने निर्माण व्यवसायी महासङ्घ पाल्पाका अध्यक्ष दामाेदर गैरेले बताउनुभयाे । अहिले सिमेन्ट, डण्डी, बालुवा, गिट्टीकाे भाउ पनि बढेकाे छ । उहाँका अनुसार निर्माण सामग्रीकाे भाउ २५ देखि ८० प्रतिशत बढेकाे बताउनुभयाे । एकातिर मुल्य आकाशिएकाे छ, अर्काेतिर कच्चा सामग्री पाउनै गाह्राे छ, महासङ्घका महासचिव राजेन्द्र केसीले भन्नुभयाे । यस्ताे अवस्थामा काम कसरी गर्ने ?
अत्यधिक मुल्य वृद्धिले जिल्लाकाे विकास निर्माणकाे अधिकांश काम राेकिएका छन् । यस्तै निर्माण क्षेत्रका सयाैँकाे राेजगारी गुम्ने सम्भावना बढेकाे छ ।
