पाल्पा– जिल्लाको बगनासकाली गाउँपालिकाले आगामी आर्थिक वर्ष २०८३÷८४ को वार्षिक नीति, कार्यक्रम तथा बजेटको सम्बन्धमा सुझाव संकलन गरेको छ । कार्यक्रममा अध्यक्ष सरस्वती चिदीले पालिकाले जनमुखी, व्यावहारिक र प्रभावकारी बनाउने गरी नीति कार्यक्रम ल्याउन सुझाव संकलन गरेकाे बताउनुभयो । उहाँले पालिकाको विकासको लागि आगामी कार्यदिशा तय गर्ने राजनीतिक दल, स्थानीय सञ्चारकर्मी र जनप्रतिनिधिहरूबीच एक अन्तरक्रिया कार्यक्रमको आयोजना गरी सुझाव संकलन गरेको छ ।
गाउँपालिकाले समावेशी र लोकतान्त्रिक पद्धतिबाट बजेट निर्माण गर्ने प्रयास स्वरूप एक महिना अगाडि नै डिजिटल माध्यमबाट सार्वजनिक रूपमा सुझाव माग गरेको थियो । गाउँपालिकाका प्रमुख प्रशासकीय अधिकृत प्रकाश पाण्डेयले आधुनिक प्रविधिको उपयोग गर्दै डिजिटल माध्यमबाट योजनाहरू संकलन गरिएको जानकारी दिनुभयो ।
पालिकाले नीति कार्यक्रमसम्बन्धी अन्तरक्रियामा नेपाल पत्रकार महासंघ पाल्पाका अध्यक्ष कमलराज तिमिल्सेनाले बगनासकाली धार्मिक र ऐतिहासिक पर्यटकीय क्षेत्र भएकाले आगामी बजेटमा धार्मिक पर्यटनको प्रवद्र्धनमा विशेष ध्यान दिनुपर्ने बताउनुभयो । पत्रकार कृष्ण पोखरेलले सिद्धार्थ राजमार्ग क्षेत्रमा सार्वजनिक खानेपानीको धारा र शौचालयको उचित व्यवस्थापन गर्न माग गर्नुभयो ।
पत्रकार मिलन विकले गरिब तथा विपन्न वर्गका लागि निःशुल्क स्वास्थ्य बीमाको व्यवस्था गर्न र बजेटलाई महोत्त्वाकांक्षी नबनाई कार्यान्वयन हुन सक्ने आकारको मात्र बनाउन सुझाव दिनुभयो । यस्तै पत्रकार नेत्र गैरेले ग्रामीण सडकहरूको दीर्घकालीन सुरक्षा र मर्मतका लागि ’लेन्थवर्कर’ को व्यवस्थापन गर्नुपर्ने बताउनुभयो । स्थानीयबासी हरी भट्टराईले विद्यालयहरूलाई गाभेर गुणस्तरीय शिक्षा प्रदान गर्न र स्थानीय मदिराको ब्रान्डिङका लागि पहल गर्नुपर्ने बताउनुभयो ।
नेकपा एमालेका नेता डेन्जिङ रायमाझीले लगानीको क्षेत्र स्पष्ट हुनुपर्ने र ग्रामीण सडकहरूको अवस्था सुधार गर्नुपर्नेमा जोड दिनुभयो । यसैगरी, नेपाली काँग्रेसका नेता यमलाल तिमिल्सेनाले ग्रामीण क्षेत्रका बस्तीहरू रित्तिँदै गएको र खेतबारी बाँझो हुने खेती गरेपनि बाँदरले सताउने गरेको बताउनुभयो ।
गाउँपालिकाका उपाध्यक्ष हरी प्रसाद पाठकले बगनासकालीको भविष्य सुन्दर रहेको चर्चा गर्दै अझै धेरै काम गर्न बाँकी रहेको र निर्माणाधीन १५ शैयाको अस्पताल आगामी असार मसान्तभित्र सम्पन्न गरी सञ्चालनमा ल्याउने तयारी भइरहेको जानकारी दिनुभयो । कार्यक्रमको समापन गर्दै गाउँपालिका अध्यक्ष सरस्वती चिदीले प्राप्त सुझावहरू अत्यन्तै महत्वपूर्ण र मार्गदर्शक रहेको बताउनुभयो ।
