पाल्पा – जिल्लाको माथागढी–१ अगाहाखोलामा ट्रक दुर्घटना हुँदा एक जना घाइते भएका छन् । घाइते हुनेमा स्याङ्जा जिल्ला गल्याङ्–८ का २४ वर्षीय सन्दिप सुनारी रहनुभएको छ । 
सिद्धार्थ राजमार्ग हुँदै बिहीबार बिहान पाल्पादेखि पोखरा जाँदै गरेको ग २ ख १००९ नम्बरको इटा बोकेको ट्रक पाल्पाको माथागढी–१, स्थित अगाहाखोला नजिकै दुर्घटना भएको प्रहरीले जनाएको छ । घाइते ट्रक चालक सुनारीको तानसेनस्थित लुम्विनी मेडिकल कलेज प्रभासमा उपचार भइरहेको छ । 
ट्रक सडकदेखि एक सय मिटर तल खसेको जिल्ला प्रहरी कार्यालय पाल्पाका प्रहरी नायव उपरीक्षक सुनिल मल्लले जानकारी दिनुभयो । घटनाको बारेमा थप अनुसन्धान भइरहेको उहाँले बताउनुभयो । घाइते सुनारीको अवस्था मध्यम् रहेको अस्पतालले जनाएको छ ।