तानसेन - पाल्पामा ट्रिपरले किच्दा एक जना महिलाको मृत्यु भएको छ । मृत्यु हुनेमा पूर्वखोला गाउँपालिका–२, जल्पाकी १९ वर्षीया दिलकुमारी आले रहनुभएको छ । दुर्घटनामा परी तीन जना घाइते भएका छन् । बुधबार बिहान साढे ८ बजेतिर निस्दी–७, ज्यामिरेबाट चुनढुङ्गा लिएर नवलपुरको होङ्सी सिमेन्टको कारखानातर्फ गइरहेको लु २ ख ५२९ नम्बरको ट्रिपर ब्रेक फेल भइ दुर्घटना भएको जिल्ला प्रहरी कार्यालय पाल्पाका सूचना अधिकारी सुगन्ध श्रेष्ठले जानकारी दिनुभयाे । ट्रिपर ब्रेक फेल भइ भित्तामा ठोक्किने क्रममा ट्रिपरमा बस्नुभएकी मृतक आलेले हाल फाल्दा सोही ट्रिपरले किचेर आलेको मृत्यु भएको श्रेष्ठले बताउनुभयाे । दुर्घटनामा परी ट्रिपरमा यात्रा गरेका पूर्वखोला–२, जल्पाका २५ वर्षीया हिमाली आले, मकवानपुर मनोहरी गाउँपालिका–९, का २६ वर्षीय अन्जन सुनार र मकवानपुर हेटौडा ९ का २४ वर्षीय आशिष सुनार घाइते हुनुभएको छ ।