पाल्पा - मण्डली मावि तेल्घामा तुलसी लक्ष्मी खराल स्मृति अक्षयकोषको स्थापना भएको छ । मण्डली माध्यमिक विद्यालय, तानसेन नगरपालिका -१० तेल्घा, सुनडाँडा, पाल्पामा वि. सं. २०३२/३३ सालतिर कक्षा ७ मा अध्ययन गर्नुभएका पूर्व विद्यार्थी भरतपुर महानगरपालिका वार्ड नं ४ निवासी हिरामणी खरालले आफ्ना मातापिताको स्मृतिमा रू. ५१,१११ को तुलसी लक्ष्मी खराल स्मृति अक्षयकोषको स्थापना गर्नुभएको हो । विद्यालयले आयोजना गरेको एक औपचारिक कार्यक्रममा उहाँले उक्त रकमको चेक विद्यालयका प्राचार्य राम बहादुर वि. क. लाई हस्तान्तरण गर्नुभयो । विद्यालय व्यवस्थापन समितिका अध्यक्ष चिन्त बहादुर कार्कीको अध्यक्षतामा चलेको उक्त कार्यक्रममा प्रमुख अतिथिको आसनबाट बोल्दै उहाँले बाल्यकालीन घटनाको स्मरण गर्नुको साथै विद्यार्थीलाई राम्रोसँग अध्ययन गर्न सुझाव दिनुभयो। शिक्षक वसन्त कार्की संचालक रहेको उक्त कार्यक्रम अध्यक्ष चिन्त बहादुर कार्कीले कृतज्ञता एवम् आभार प्रकट गर्दै समापन गर्नुभयो। विद्यालयका प्र.अ. राम बहादुर वि कले आफ्नो पाँचौ कृति " किस्ताकिस्तामा जिन्दगी " कवितासंग्रह सोही अवसरमा प्रमुख अतिथिलाई उपहारस्वरूप प्रदान गर्नुभयो ।