तानसेन - पाल्पामा जन्मिएर राष्ट्रिय तथा अन्तराष्ट्रिय स्तरमा ख्याती कमाउन सफल अग्रज संगीतकार एवं निर्देशक नारायण रायमाझीको चलचित्र ‘परदेशी–२’को नयाँ गीत युट्युबमा सार्वजनिक गरिएको छ । चलचित्रमा समावेश ‘परदेशी छुकछुके रेलैमा…’बोलको झ्याउरे गीत बुधवार बिहान सार्वजनिक गरिएको हो । यो गीतको छायांकन पाल्पाकै सराईमा गरिएको थियो । यो गीतको भिडियोमा चलचित्रका मुख्य कलाकारहरु अभिनेता प्रकाश सपूत, अभिनेत्री केकी अधिकारीसँगै अर्का अभिनेता प्रशान्त तामाङलाई प्रस्तुत गरिएको छ । पाल्पाली कलाकारहरु समेत भिडियोमा देखिएका छन् । गीतमा निर्देशक रायमाझी स्वयंमसँगै तेजेन्द्र गुरुङ, टिका पुन, देवी घर्ती र ममता गुरुङले स्वर दिनुभएकाे छ । शब्द पनि निर्देशक रायमाझी स्वयंमले कोर्नुभएकाे हाे । उहाँसँगै प्रेमदेव गिरीले यसमा संगीत दिनुभयाे । राजेश वंशल र नारायण रायमाझीको निर्माण रहेको परदेशी–२’मा प्रकाश, केकी र प्रशान्तका साथमा वर्षा शिवाकोटी, दीलिप रायमाझी, नीर शाह, रमा थपलिया, सबिन बास्तोला, देबेन्द्र बब्लुलगायतको अभिनय छ । चलचित्रको कथा एवं पटकथा रमेश बिजीले लेख्नुभएकाे हाे । युवापुस्तामा रहेको विदेश मोहको कथामा चलचित्र निर्माण गरिएको हो । ‘परदेशी २’ दशैंको छेको पारेर यही असोजको २६ गतेबाट प्रदर्शनमा आउँदैछ । यसअघि ‘गोर्खा पल्टन’ र ‘परदेशी’ जस्ता सुपरहिट चलचित्र दिएका नारायण रायमाझीको ‘परदेशी २’ तेस्रो चलचित्र हो । पाल्पा तानसेनको सन्तोष चलचित्र मन्दिरमा पनि २६ गतेबाटै चलचित्र प्रदर्शनमा आउनेछ । यो चलचित्रको छायांकनका लागि प्रकाश सपूत, केकी अधिकारी, प्रशान्त तामाङ, दीलिप रायमाझी लगायतका चर्चित कलाकार पाल्पामा आउनुभएकाे थियाे । चलचित्र हेर्न देशभरका हलसँगै तानसेनको हलमा पनि दर्शकको भीड लाग्ने अनुमान गरिएको छ । हेर्नुहाेस् भिडियाे https://www.youtube.com/watch?v=G3FNPwBdJiw