पाल्पा – संविधान दिवसको अवसरमा तानसेनको शित्तलपाटीमा नेकपा (माओवादी केन्द्र) निकट विद्यार्थी संगठनले दीप प्रज्वलन गरेको छ । संविधान जारी भएको दिनको सम्झना गर्दै अखिल क्रान्तिकारीले दीप प्रज्वलन गरेको क्रान्तिकारीका जिल्ला इन्चार्ज पदम सोमैले जानकारी दिनुभयो । दीप प्रज्वलन कार्यक्रममा नेकपा माओवादीका केन्द्रीय सदस्य अनिलकिशोर घिमिरेले सबै पक्षलाई समेटेर जारी गरिएको संविधानको प्रभावकारी कार्यान्वयन हुनुपर्नेमा जोड दिनुभयो । उहाँले माओवादीको नेतृत्वमा देशमा आमूल परिवर्तन भएकाले त्यो परिवर्तनलाई संस्थागत गर्न वर्तमान संविधान कार्यान्वयन गर्नुको अर्को विकल्प नरहेको बताउनुभयो । दीप प्रज्वलन कार्यक्रममा माओवादीका स्थायी कमिटि सदस्य कृष्णध्वज खड्का, जिल्ला संयोजक राजेन्द्र विश्वकर्मा, संविधानसभाका सदस्य लिला सोमै, तुल्सा राना, तानसेन नगरपालिकाकी उपप्रमुख प्रतीक्षा सिंजालीलगायतका नेताहरुको सहभागिता रहेको थियो । कार्यक्रम अखिल क्रान्तिकारीका त्रिभुवन बहुमुखी क्याम्पसमा नेता ताराबहादुर रायमाझीकाे अध्यक्षता, भीम लुंगेलीकाे संचालनमा सम्पन्न भएकाे थियाे ।