पाल्पा – जिल्लाका स्थानीय तहमा कार्यरत कर्मचारीहरुले ज्ञापन पत्र बुझाएका छन् । उनीहरुले देशभरका स्थानीय तह मार्फत सामान्य प्रशासन मन्त्रालयलाई ज्ञापन पत्र बुझाएका हुन् । यसै विचमा माथागढी गाउँपालिका पाल्पामा कार्यरत कर्मचारीहरुले समेत ज्ञापन पत्र बुझाएका छन् । उनीहरुले प्रमुख प्रशासकीय अधिकृत दिनेश ज्ञवालीलाई ज्ञापन पत्र बुझाएका हुन् । प्रशासनिक संरचनामा संघीय निजामती सेवा, प्रदेश निजामती सेवा र स्थानीय सेवा भन्ने विभेदकारी नीति निर्माण गर्ने संघीय मामिला तथा सामान्य प्रशासन मन्त्रालयले विभेद गरेको उनीहरुको भनाई छ । मन्त्रालयले निजामती दिवश मनाउने भनी यस गाउँपालिकालाई पत्राचार गरेको हुँदा स्थानीय तहमा कार्यरत कर्मचारीहरुको सेवा सुविधा, वृत्ति विकासको सुनिश्चितता नभएको र प्रस्तावित निजामती सेवा ऐनको मस्यौदामा स्थानीय तहका कर्मचारीहरुलाई निजामती परिभाषामा नसमेटिएको भन्दै उनीहरु आन्दोलित भएका हुन् । निजामती दिवशको दिन भाद्र २२ गते विरोध स्वरूप कालोपट्टी बाँधी विरोध जनाउने र स्थानीय कर्मचारीको सेवा सुविधा सम्बन्धी व्यवस्था नभए सम्म निजामती सेवा दिवस नमनाउने निर्णयका साथै सम्बन्धित निकायको ध्यानाकर्षण सहित ८ बुँदे ज्ञापन पत्र बुझाएको माथागढी गाउँपालिकाका अधिकृत नित्यानन्द खनालले रानीमहललाई जानकारी दिनुभयो । हेर्नुहोस माग पत्र ः १. संघीय निजामती सेवा ऐन नभई एकिकत निजामती सेवा ऐन ल्याउनु पर्ने । २. सेवा समूहको आधारमा सरकारी सेवाको प्रवेशद्वार स्थानीय सेवामा मात्र हुनु पर्ने । ३. सरुवा प्रणालीलाई सहमतीका आधारमा नभई अनुमानयोग्य चक्रिय प्रणालीमा आधारित हुनु पर्ने ४. अन्तर प्रदेश सरुवाको व्यवस्था संघीय ऐनमाने खुलाउनु पर्ने । ५. निजामती अस्पतालमा उपचारका लागि सबै सरकारी कर्मचारीहरुलाई समेट्नु पर्ने । ६. संघ, प्रदेश र स्थानीय तहका कर्मचारीहरुको सेवा सुविधा वृत्ति विकास सम्बन्धमा विभेद नभई समान हुनुपर्ने । ७. प्रमुख प्रशासकीय अधिकृतको पद स्थानीय सेवाको हुनुपर्ने । ८. स्थानीय सेवामा कार्यरत कर्मचारीहरुको पूर्ण सुरक्षाको प्रत्याभुति हुनुपर्ने ।