पाल्पा - पाल्पामा लागूऔषधसहित एक जना युवकलाई प्रहरीले नियन्त्रणमा लिएको छ । तानसेन–२, नारायणस्थानमा डेरा गरी बस्ने सर्लाही जिल्ला इश्वपुर नगरपालिका–१२ का २४ वर्षीय कमलकुमार खड्कालाई प्रहरीले लागूऔषध सहित नियन्त्रणमा लिएको हो । प्रहरीले खड्का बस्ने कोठाको विभिन्न स्थानमा लुकाएर राखेका डाएडोपम, फेनारगन, आइपीपीएल, टालजेसिकलगायका लागूऔषध बरामद गरेको छ । खड्काको कोठामा ९३ एम्पुल लागूऔषध र लागूऔषध प्रयोगकर्ताका लागि सिरिन्जलगायतका सामग्री फेला परेको जिल्ला प्रहरी कार्यालय पाल्पाले जनाएको छ । खड्काले अरु मानिसलाई समेत लागूऔषध बिक्री गरेको भन्ने गोप्य सूचनाका आधारमा अनुसन्धान गरी पक्राउ गरिएको जिल्ला प्रहरी कार्यालय पाल्पाका सूचना अधिकारी वीरेन्द्र थापाले जानकारी दिनुभयो । थप अनुसन्धान भइरहेको प्रहरीले जनाएको छ ।