तानसेन – पाल्पाको रानीमहल नजिकै भारतीय नम्बरको कार दुर्घटना भएको छ । उक्त दुर्घटनामा परी तीन जना घाइते भएका छन् । घाइतेमध्ये एक जनाको गम्भीर अवस्था रहेको छ । भारत गोरखपुरबाट पाल्पाको रानीमहल जाने क्रममा रानीमहल नजिकै बुधबार बेलुकी पौने ४ बजेतिर दुर्घटनामा परेको हो । भारतीय नम्बर प्लेट युपी ५५ वाई ३३०१ नम्बरको कार दुर्घटना भएको प्रहरीले जनाएको छ । कारमा सवार चार जनामध्ये रुपन्देही जिल्ला (अन्य ठेगाना नखुले) का ५० वर्षका बुद्धिराम मुराउ गम्भीर घाइते हुनुभएको छ । यस्तै भारत देश उत्तरप्रदेश बस्ने वर्ष ६० का कृष्णनारायण तिवारी र भारत देश उत्तरप्रदेश ककरहवा बस्ने वर्ष ५२ का वीरेन्द्र पाण्डेय घाइते हुनुभएको छ । तिवारी र पाण्डेयको अवस्था भने सामान्य रहेको पाल्पास्थित मिसन अस्पतालले जनाएको छ । घाइते तीनै जनाको मिसन अस्पतालमा उपचार भइरहेको जिल्ला प्रहरी कार्यालय पाल्पाका सूचना अधिकारी वीरेन्द्र थापाले जानकारी दिनुभयो ।