पाल्पा – पाल्पामा पौडी खेल्ने क्रममा नदीमा डुबेर एक जना बालकको ज्यान गएको छ । जिल्लाको माथागढी–३, अगहनी बस्ने १५ वर्षका योगेश सुनारीको पौडी खेल्ने क्रममा तिनाउ नदीमा डुबेर मृत्यु भएको हो । सोमबार साँझ ६ बजेतिर साथीहरूसँगै तानसेन–९, र माथागढी–३, को सिमाना पर्ने तिनाउ नदीमा पौडी खेल्न गएका थिए । पौडी खेल्ने क्रममा डुबेर गम्भीर भएका सुनारीलाई उपचारका लागि तानसेनस्थित लुम्विनी मेडिकल कलेज प्रभासमा ल्याइएको थियो । सुनारीको उपचारको क्रममा राति साढे ८ बजेतिर मृत्यु भएको जिल्ला प्रहरी कार्यालय पाल्पाले जनाएको छ । सुनारी दमकडा माध्यमिक विद्यालयको कक्षा १० मा अध्ययनरत विद्यार्थी हुन् ।