पाल्पा - प्रेस चौतारी नेपाल पाल्पा शाखाले आफ्नो २४ औँ स्थापना दिवस मनाएको छ । विभिन्न शीर्षकका अक्षयकोष पत्रकारिता पुरस्कारबाट पुरस्कृत हुने पत्रकारहरुको नाम घोषणा तथा शुभकामना आदान प्रदान कार्यक्रम गरी स्थापना दिवस मनाइएको हो । स्थापना दिवसका अवसरमा संगठनमा विभिन्न अक्षयकोष दाताले स्थापना गरिदिनुभएकाे भद्रबहादुर स्मृति कृषि पत्रकारिता पुरस्कार २०८० बाट अन्नपूर्ण दैनिकका पत्रकार कृष्ण प्रसाद पोखरेल, सितादेवी स्मृति पर्यटन पत्रकारिता पुरस्कार २०८० बाट मेचिकाली राष्ट्रिय दैनिक पत्रिकामा कार्यरत नेत्रप्रसाद गैरे र सामुदायिक रेडियो मुक्तिनाथमा आबद्ध भुवन रायमाझीलाई प्रदान गर्ने घाेषणा गरिएकाे छ । यस्तै गीता स्मृति शिक्षा पत्रकारिता पुरस्कार २०८० बाट सामुदायिक रेडियो मदनपोखरामा कार्यरत रीमा सोमै, रेडियो पत्रकारिता पुरस्कार २०८० बाट सामुदायिक रेडियो मदनपोखरामा कार्यरत बिजयकुमार वौडेल, शेषकुमारी लोकप्रसाद स्मृति शिक्षा पत्रकारिता पुरस्कार २०८० बाट पृथ्वी टेलिभिजन रामपुरमा कार्यरत कृष्ण पौडेललाई दिने निर्णय भएकाे छ । पुतली रुपनारायण स्मृति सामाजिक विकास पत्रकारिता पुरस्कार २०८० बाट बोली खवर डककमकी बन्दना पोखरेल र तुलसा तुलबहादुर स्मृित सामाजिक विकास पत्रकारिता पुरस्कार २०८० बाट हरिबहादुर विकलाई वितरण गर्ने घोषणा गरिएको छ । पुरस्कृत हुने पत्रकारहरुले नगद सहित प्रमाण पत्र र दोसल्लाले सम्मान गरिने छ । घोषणा गरिएको पुरस्कार आगामी जेष्ठ महिनामा विशेष दिन पारेर वितरण गरिने अध्यक्ष कृष्ण कार्कीले बताउनुभयाे । कार्यक्रममा लुम्विनी प्रदेश सभा सदस्य खेमबहादुर सारुले हरेक संघ संगठनका नाराहरु अति प्रिय हुन्छन तर काम भने ठीक विपरित हुने गरेकाेमा चिन्ता व्यक्त गर्नुभयाे । जिल्ला समन्वय समिति पाल्पाका प्रमुख टंकनाथ खनालले पत्रकार भनेको समाजको ऐना भएकोले सत्य, तथ्य, सत्य, आधारित भएर काम गर्नुपर्ने बताउनुभयाे । नेकपा एमाले पाल्पाका अध्यक्ष धनेन्द्रराज घिमिरेले २४ औं स्थापना दिवसका अवसरमा शुभकामना व्यक्त गर्नुभयाे । प्रेस चौतारीका केन्द्रीय सदस्य तथा लुम्बिनी प्रदेश सहइन्चार्ज कमलराज तिमिल्सेना, केवशराज नेपाल, नेपाल पत्रकार महासंघका उपाध्यक्ष भरत शर्मा शुभकामना दिनुभयाे । यस्तै नेपाल प्रेस युनियनका केन्द्रिय उपाध्यक्ष माधव अर्याल, प्रेस सेन्टर पाल्पाका कोषाध्यक्ष कमल अधिकारी, प्रेस चौतारी तानसेन नगर कमिटीका अध्यक्ष गुणवती केसीले समेत शुभकामना दिनुभयाे । शाखा अध्यक्ष कृष्ण कार्कीको अध्यक्षतामा भएको कार्यक्रम सहसचिव सन्तोष ज्ञवालीको संचालनमा भएको हो ।