पाल्पा – सिद्धार्थ राजमार्ग अन्तर्गत तिनाउ–५, जोरधारा नजिकै भएको बस दुर्घटनामा एक जनाको मृत्यु भने ३६ जना घाइते भएका छन् । बस दुर्घटनामा परेर मृत्यु हुनेमा रुपन्देही जिल्ला देवदह–३, का ३५ वर्षीया राधिका पौडेल रहनुभएको छ । बस दुर्घटनामा परी ३६ जना घाइते भएका छन् । घाइतेमध्ये ६ जनाको अवस्था गम्भीर रहेको जिल्ला प्रहरी कार्यालय पाल्पाका सूचना अधिकारी प्रहरी नायव उपरीक्षक वीरेन्द्र थापाले जानकारी दिनुभयो । घाइते सबैको तानसेन प्रभासस्थित लुम्विनी मेडिकल कलेज प्रभासमा उपचार भइरहेको छ । घाइतेहरूलाई प्रहरी, सेना, स्थानीय बासिन्दाको सहयोगमा उद्दार गरिएको थियो । आइतबार बिहान बुटवलबाट पाल्पा हुँदै बाग्लुङ्को बुर्तिबाङ् हिँडेको लु १ ख ५९५६ नम्बरको बस बिहान दुर्घटनामा परेको हो ।