पाल्पा – नेपाल पत्रकार महासंघको स्थापना दिवशको अवसरमा पाल्पामा पत्रकारलाई निशुल्क आँखा परीक्षण गरिएको छ । पाल्पा शाखाको आयोजना तथा नेपाल नेत्र ज्योति संघ पाल्पा लायन्स आँखा अस्पतालको प्राविधिक सहयोगमा जिल्लाका पत्रकारलाई आँखा परीक्षण गरिएको हो । आँखा शिविरमा ३३ जना पत्रकारहरुले आँखा परीक्षण गराएका थिए । आँखा परीक्षण कार्यक्रममा नेपाल नेत्र ज्योति संघ पाल्पा शाखाका सभापति बुद्धि प्रसाद शर्माले पत्रकार महासंघसँगको सहकार्यमा आँखा शिविर चलाउन पाउँदा खुसी लागेको बताउनुभयो । उहाँले आगामि दिनमा समेत आँखा अस्पतालले पत्रकारसँग सहकार्य गर्ने बताउनुभयो । संघका सचिव भीमसेन कार्कीले पत्रकारले आँखा अस्पतालको सेवा सुविधाको बारेमा जनतासँग सुसूचित गराउन महत्वपूर्ण सहयोग गर्ने विश्वास व्यक्त गर्नुभयो । पत्रकार महासंघ पाल्पाका अध्यक्ष रेखीराम रानाले पत्रकारले आँखा अस्पतालको गतिविधि तथा आँखा अस्पतालको विकासको लागि सदैव आफ्नो क्षेत्रबाट हातमालो गर्ने बताउँदै निशुल्क शिविर संचालन गर्न सहयोग गरेकोमा अस्पताल परिवारलाई धन्यवाद दिनुभयो । आँखा परीक्षणका क्रममा अधिकांश पत्रकारकाे विभिन्न खालकाे समस्या देखिएकाे अस्पतालका नेत्र सहायक सन्ताेष दर्जीले बताउनुभयाे ।