(निस्दी), पाल्पा – जिल्लाको निस्दी गाउँपालिका वडा नम्बर– ६, अर्चलेको वडा कार्यालय भवनको शिलान्यास गरिएको छ । गाउँपालिका अध्यक्ष मुक्त बहादुर सारुले एक कार्यक्रमकाबीच भवनको शिलान्यास गर्नुभएको हो । शिलान्यास कार्यक्रममा बोल्दै अध्यक्ष सारुले वडा कार्यालयको भौतिक सुधारका लागि आफू जहिले पनि सकारात्मक रहेको बताउँदै जनप्रतिनिधिले निर्णय गरेको योजना तथा कार्यक्रममा कर्मचारीले सहयोग गर्नुपर्ने बताउनुभयो । उहाँले अर्चलेको विकास गर्न स्थानीयबासी नै लाग्नुपर्नेमा जोड दिनुभएको थियो । कार्यक्रममा वडाध्यक्ष मेख बहादुर सुनारीले अर्चलेको खेलमैदानमा वडा कार्यालय बन्ने भएकोले अब तत्काल अर्को खेल मैदानको व्यवस्था गर्नुपर्ने बताउनुभयो । नयाँ स्वास्थ्य चौकी माथि रहेको खेल मैदानमा निर्माण हुने भवन गाउँपालिकाको ५० लाख रुपैयाँँको लागतमा निर्माण हुन लागेको हो । वडाध्यक्ष सुनारीको अध्यक्षतामा भएको कार्यक्रमको संचालन वडा सचिव सावित्रा गैरेले गर्नुभएको हो ।