पाल्पा – जिल्लाको रिव्दीकोट गाउँपालिका–७, पालुङ्मैनादीस्थित साहारा सहकारीको बारेमा छानविन गर्न अख्तियार दुरुपयोग अनुसन्धान आयोगको कार्यालय बुटवलले रिव्दीकोट गाउँपालिकालाई पत्र पठाएको छ । लामो समयदेखि उक्त सहकारीको लेखा परीक्षण नभएको र अध्यक्षलगायतले सहकारीको रकम हिनामिना पारेको भन्दै उजुरी परेपछि अख्तियार दुरुपयोग अनुसन्धान आयोगले गाउँपालिकालाई छानविन गरी कारबाही गर्न पत्र पठाएको छ ।
गाउँपालिकाले भने उक्त पत्र प्राप्त हुनासाथ सहकारीमा बुझ्ने काम भइरहेको जनाएको छ । गाउँपालिकाका सहकारी हेर्ने कर्मचारी खिमबहादुर थापाक्षेत्रीले सहकारीको साधारणसभा, लेखापरीक्षण तथा संचालक समितिको पदाधिकारीबारे बुझ्ने काम भइरहेको बताउनुभयो ।
गाउँपालिकाका सूचना अधिकारी रुकलाल भट्टराईले सहकारीको विषयमा बुझ्ने काम भइरहेको बताउनुभयो । उहाँले सहकारी कोपोमिसमा आवद्ध भएको नदेखिएकाले थप विवरण बुझ्ने काम भइरहेको जानकारी दिनुभयो । अख्तियार दुरुपयोग अनुसन्धान आयोगको कार्यालय बुटवलले पठाएको पत्र सामाजिक संजालबाट बाहिर आएको छ ।
