होम राई मगर पाल्पा / निस्दी गाउँपालिका पाल्पाको सबै वडाहरुमा ४३औं राष्ट्रिय मगर एकता दिवस विविध कार्यक्रमका साथ मनाएको छ । जम्मा ७ वटा वडा रहेको निस्दीमा आ-आफ्नो कार्ययोजना अनुसार दिवस मनाएको गाउँपालिकाले जनाएको छ । मगर एकता दिवस मनाउनका लागि प्रत्येक वडालाई बजेट विनियोजन गरेको अध्यक्ष मुक्त बहादुर सारुले बताउनुभयो ।
जम्मा ८७ प्रतिशत मगर समुदाय रहेको निस्दीमा मगर संस्कृतिहरुलाई संरक्षण गर्न गाउँपालिकाले योजना अनुसार कार्य सन्चालन गरिने उहाँको भनाइ रहेको थियो । यसैबीच निस्दीको अर्चलेमा पनि विविध कार्यक्रमको आयोजना गरि मगर एकता दिवस मनाएको छ ।
कार्यक्रममा नेपाल मगर महिला संघका केन्द्रिय अध्यक्ष हिरु राना मगरले फागुन १५ गते मगर जतिहरुको सांगठनिक पर्व रुपमा मनाउदै आएको बताउनुभयो । कार्यक्रमका मुख्य पाहुना समेत रहनु भएका अध्यक्ष राना मगरले पछिल्लो समयमा भाषा र संस्कृति लोप हुन लागेकोमा चिन्ता व्यक्त गर्दै आफ्नो पहिचानलाई संरक्षण गर्न समूहगत एकता हुनुपर्नेमा जोड दिनु भएको थियो ।
यसैगरी नेपाल लोकतान्त्रिक मगर संघ लुम्बिनी प्रदेश कमिटीका सदस्य यम बहादुर रानाले निस्दीमा मगर समुदायको बहुल्यता रहेको बताउनु हुँदै स्थानीय सरकारले मगरभाषालाई सरकारी कामकाजको भाषा बनाउनु पर्ने बताउनुभयो । कार्यक्रममा विभिन्न टोलहरुबाट लोपोन्मुख सांस्कृतिक झांकीहरु प्रस्तुत गरिएको थियो ।
कार्यक्रममा मगर संस्कृति सम्बन्धि सालैजो,झ्याउरे,कौरा र नाचरी नाचहरु प्रस्तुत गरिएको थियो । त्यसैगरी अर्चलेको विभिन्न विद्यालयमा अध्ययनरत विद्यार्थीहरुलाई छात्रवृत्ति स्वरुप कापी र कलम वितरण गरिएको थियो । वडा अध्यक्ष मेख बहादुर सुनारीको अध्यक्षतामा भएको कार्यक्रमको सदस्य मिम्श्री बयम्बुले स्वागत र होम राई मगरको सन्चालनमा भएको हो ।
