पाल्पाको तिनाउ र बगनासकालीमा दुई जनाको मृत्यु

पाल्पा – जिल्लाकाे तिनाउ र बगनासकालीमा दुई जनाको मृत्यु भएको छ । एक जनाको रुखबाट लडेर र अर्काे एक जना मृत अवस्थामा फेला परेका हुन्।

जिल्लाको तिनाउ गाउँपालिका–२, पाँचकुनाका ५५ वर्षीया रीमा सारुको रुखबाट लडेर मृत्यु भएको छ । मंगलबार आफ्नै घर पछाडिको खनियाँको रुपमा चढेर घाँस काट्ने क्रममा लडेर सारुको मृत्यु भएको जिल्ला प्रहरी कार्यालय पाल्पाले जानकारी दिएकाे छ ।

यस्तै जिल्लाको बगनासकाली–२, पोखराथोक ठूलीचउरमा एक पुरूष मृत फेला परेका छन् । मृत भेटिएका पुरूष बर्दिया जिल्ला गेरुवा–२ का ३५ वर्षीय मायाराम थारु रहेकाे जिल्ला प्रहरी कार्यालय पाल्पाका प्रहरी निरीक्षक सन्दीप बेल्बासेले इरानीमहललाई जानकारी दिनुभयाे ।

पोखराथोकमा कमल निर्माण सेवाको काम गर्दै आउनुभएका थारु बुधबार निर्माणस्थलमा मृत फेला परेको प्रहरीले जनाएकाे छ ।