स्वास्थ्य तथा जनसंख्या मन्त्रालयले गर्भवति महिलाहरुलाई कोरोना विरुद्धको खोप लगाउन अनुरोध गरेको छ ।
स्वास्थ्य सेवा विभाग, परिवार कल्याण महाशाखाका निर्देशक डा. विवेककुमार लालले पहिलो तीन महिना कटिसकेका सबै गर्भवति महिलाहरुलाई नजिकैको खोप केन्द्रमा गई खोप लगाउन अनुरोध गर्नुभएको छ ।
उहाँले भन्नुभयोे,‘गर्भवतिलाई खोप दिन सुरु भईसकेको पनि छ । खोप नलगाएका पहिलो तीन महिना कटेका सबै महिलालाई नजिकैको खोप केन्द्रमा गई खोप लगाएर आफुलाई सुरक्षित राख्न अनुरोध छ ।’
उहाँले नेपालमा उपलब्ध खोपमध्ये कुनै पनि खोप लगाउन सकिने बताउनुभयो । नेपालमा हाल अक्सफोर्ड एस्ट्राजेनेका, कोभिसिल्ड, भेरोसेल, फाइजर र मोडर्ना खोप उपलब्ध छ । निर्देशक लालले हाल कोभिसिल्ड र भेरोसेल खोप पर्याप्तm रहेको बताउनुभयो ।
फाइजर र मोडर्ना भने सरकारले १२ देखि १८ वर्षसम्मका बालबालिकालाई लगाउने निर्णय गरिसकेको छ ।
उहाँले पछिल्लो समय कोरोना विरुद्धको खोपको अभाव नभएको र आगामी दिनका लागि खोप सुनिश्चिता भई सकेको भन्दै कुनै शंका नमानि खोप लगाउन आग्रह गर्नुभयो ।
खोपको उपलब्ध हेरी सरकारले कोरोना विरुद्धको खोप अभियान रणनीति परिवर्तन गरी १८ वर्ष माथिका सबैलाई खोप सुरु गरेको निर्देशक लालले बताउनुभयो ।
उहाँले १२ वर्षदेखि १८ वर्षमुनिका बालबालिकाका लागि फाइजर र मोडर्ना खोप आउन लागेकोले सबै विद्यालयमा खोप केन्द्र राखि अभियान संचालन गरिने बताउनुभयो ।
उहाँले भन्नुभयो,‘आगामी केही दिन भित्रै अभियान खोप अभियान संचालन गर्न पूर्व तयारी गरिरहेका छौँ । त्यस समयमा सबैले सहयोग गर्नुहोला ।’
प्रकाशित मिति: बिहीबार, मंसिर २३, २०७८ १२:४९
प्रतिक्रिया दिनुहोस्
साताको लोकप्रीय