पाल्पा– दिल्लीको क्वारेन्टाइनमा पाल्पा जिल्लाका निस्दी सहितका २३ जना तीन हप्तादेखि स्वदेश फर्किने प्रतिक्षामा रहेका छन् । दिल्लीमा कार्यरत पाल्पा निस्दी ४ र ५ का दुई जना युवा सहित २३ जनाको समूह स्वदेश फर्किने आशमा दिल्ली सिकान्दरवादको क्यारेन्टाइनमा दिन विताइरहेका हुन् । आफूहरु सँगै कार्यरत १ सय ५० बढी नेपालीहरु स्वदेश फर्किएर गाउँकै क्वारेन्टाइनमा बसेको भएता पनि आफूहरुलाई देशमा फर्किन स्थानीय एमडी र भारतका लागि नेपाली दुतावासले पहल नगरेको उनीहरुको आरोप छ । उनीहरुले त्यहाँ एमडिसँग कुरा गर्दा नेपालबाट अनुमति नआउँदा सम्म पठाउन नसकिने बताएको उनीहरुले जनाएका छन् । आफूहरु स्वदेश फर्किने सम्बन्धमा २० दिनदेखि नेपाली दुतावासमा सम्पर्क गरेको भएता पनि उनीहरुले नेपाल फर्किन नमिल्ने बताएका कारण अलपत्र परेको निस्दीका युवा पृथ्वीमान बारघरेले रानीमहलसँगको कुराकानीमा बताउनुभयो । उहाँले भारतमा ३।४ वटा क्वारेन्टाइन फेर्दै राख्दै गरेको भएता पनि स्वेदेश फकाउने सम्बन्धमा कुनै निर्णय नहुँदा समस्या परेको बताउनुभयो । आफूहरु गाउँ फर्किन व्यग्र प्रतिक्षामा रहेकोले स्थानीय सरकार गाउँपालिका र जिल्ला प्रशासन र नेपाल सरकारले तत्काल पहल गर्नुपर्ने उनीहरुको माग छ । आफ्नो माग सम्बन्धित स्थानमा पुर्याइदिन समेत उनीहरुले रानीमहलसँगको कुराकानीमा बताएका छन् । खानको लागि व्यवस्थापन राम्रो भएता पनि खानेपानीको समस्या रहेको र भारतीय भूमिमा बस्नुभन्दा स्वदेशमै फर्किएर बस्न चाहेको उनीहरुको भनाई छ । यस सम्बन्धमा पाल्पा निस्दी गाउँपालिकाका प्रमुख मुक्तबहादुर सारुलाई जानकारी गराउँदा उहाँले भारतीय सीमा नाकामा अलपत्र र अन्य शहरमा रहेका नागरिकहरुको तथ्यांक संकलन भइरहेकोले छिट्टै नै उहाँहरुलाई स्वदेश ल्याउने बताउनुभयो । त्यसका लागि सरकारी तबरमा समेत छलफल भइरहेको बताउनुभयो । त्यहाँ रहेका २३ जनाको समूहमा पाल्पाका २ जना, दाङ्ग तुल्सीपुरका ६ जना, प्युठानका १ जना र नेपालगञ्ज बाँकेका १४ जना रहेका छन् । तस्वीर भारतमा अलपत्र अवस्थामा क्वारेन्टाइनमा बसेका नेपालीहरु तस्वीर ः पृथीमान बारघरेको सहयोगमा ।